HOT NEWSS ASKARI WA JESHI LA POLISI NA WENZIE WAHUKUMIWA KIFUNGO CHA MIAKA 30 JELA.

Kutoka kushoto ni mshitakiwa wa pili Elinanzi Eliabu Mshana, Mshtakiwa wa nne Mbaruku Hamis, Mshita

kiwa wa tatu Juma Mussa ambaye aliyekuwa Askari Magereza kwa Cheo cha Sajini , Anaefuatia ni Mshtakiwa wa kwanza PC James aliyekuwa Askari Polisi Wilaya ya Mbeya, na wa mwisho ni Mshitakiwa wa Tano Amri Kihenya .

 Washitakiwa wanne kati ya watano kutoka kushoto juu hadi wa nne wakiwa wanatoka mahakamani chini ya ulinzi mkali.

Moja ya Gari lililotumika kufanya uharifu wa unyang'anyi wa kutumia silaha

Ulinzi mkali uliimalishwa mahakamani hapo

MAHAKAMA ya Mkoa wa Mbeya imewahukumu kifungo cha miaka 30 jela waliokuwa askari wawili, James Kagoma wa Jeshi la Polisi na Juma Mussa wa Jeshi la Magereza na raia watatu, baada ya kupatikana na hatia katika kesi ya Unyang’anyi wa Kutumia Silaha.

Mbali na kifungo hicho, mahakama hiyo pia imeamuru kutaifishwa kwa magari mawili madogo yaliyotumika katika unyang;anyi huo, ambayo ni mali ya aliyekuwa askari Polisi, James Kagoma na lingine la mshtakiwa namba mbili katika kesi hiyo, Elinaza Mshana.

Akitoa hukumu hiyo iliyochukua muda wa saa Mbili na dakika 30 kuanzia saa 4:20 asubuhi hadi saa 6:30 mchana, Hakimu Mkazi Mfawidhi wa Mahakama ya Mkoa wa Mbeya, Michael Mteite, amesema upande wa mashtaka umefanikiwa kuitihibitishia mahakama hiyo bila shaka kuwa washtakiwa wote watano wametenda kosa hilo Januari 3 mwaka huu, saa 11  jioni kwenye mlima Kawetele barabara ya kutoka Mbeya kwenda Chunya kwa kuwapora wafanyabiashara wawili wenye asili ya kiasia shilingi milioni tatu na nusu na vitu mbalimbali zikiwemo simu mbili za mkononi, laptop mbili na mabegi matatu ya nguo.

Mbali na askari hao wa zamani, James Kagoma na Mussa Juma na raia Elinaza Mshana, wengine waliohukumiwa kifungo hicho ni  Mapacha, Mbaruku Hamisi na Amri Kihenya, huku upande wa mashtaka ukiongozwa na Wakili wa Serikali, Achiles Mulisa akisaidiwa na Basilius Namkambe na washtakiwa hao wakitetewa na Jopo lililoongozwa na Wakili Ladislaus Rwekaza akisaidiwa na John Stephen na Daniel Muya.

Hakimu Mteite, amesema mahakama imefikia uamuzi huo kwa kuzingatia mambo Sita, Kwanza ni kufananana kwa ushahidi wa uliotolewa na aliyekuwa dereva wa wafanyabiashara hao,  Ezekia Matatila na Mmoja kati wa Wafanyabiashara hao, Pasupuret Sreedhar ambaye ni raia wa India.

Pili ni kuwiana kwa ushahidi wa mashahidi hao na maelezo ya tukio hilo kutoka kwa Maafisa Wanne wa Polisi waliotoa ushahidi wao mahakamani hapo ambao ndiyo waliowakamata washtakiwa hao siku ya tukio.

Tatu ni maelezo ya utetezi ya washtakiwa hao kuthibitisha kuwa siku ya tukio wote walikuwa pamoja katika eneo la tukio na muda unaodaiwa kufanyika tukio hilo.

Nne ni uthibitisho kuwa vitu vyote vinavyodaiwa kuporwa na washtakiwa hao kutoka kwa Wafanyabiashara hao kukutwa kwenye magari mawili waliyokuwa wakiyatumia ambayo ni Toyota Cresta namba T 782 BEU mali ya Elinaza Mshana na Grand Mark II  lenye namba za cheses GX 115 6011835 mali ya aliyekuwa askari Polisi, James Kagoma.

Tano ni jeraha la risasi la mshtakiwa namba mbili, Elinaza Mshana, kwenye paja lake la mguu wa kulia, linathibitisha maelezo ya askari polisi kuwa walilazimika kumpiga risasi ya mguu ili kumzuia asikimbie siku ya tukio hilo.

Na Sita, Hakimu Mteite, amesema kitendo cha Shahidi wa Kwanza, dereva Ezekia Matatila na Shahidi wa Tatu, Mmoja kati wa Wafanyabiashara walioporwa, Pasupuret Sreedhar, kuwatambua kwa ufasaha washtakiwa hao mahakamani hapo.

Kutokana na ushahidi huo, Hakimu Mteite, amesema mahakama yake imewahukumu washtakiwa hao kifungo cha miaka 30 jela na kuamuru magari hayo mawili kutaifishwa huku akiondoa adhabu ya kuchapwa viboko kwa sababu ya huruma kufuatia kupigwa risasi kwa mshtakiwa namba mbili, Elinaza Mshana.

Hata hivyo, Wakili Kiongozi wa Upande wa Utetezi, Ladislaus Rwekaza amesema wanataraji kukata rufaa.