MWAMBUSI KULEJEA MBEYA CITY>>>>SOMA HAPA

Kocha Mkuu wa Timu ya Mbeya City Juma Mwambusi

Na EmanuelMadafa,Mbeya

Siku chache mara  baada ya aliyekuwa kocha mkuu wa klabu ya Mbeya City, Juma Mwambusi kutangaza kujiuzulu, kumeibuka tetesi kwamba huenda kocha huyo akarejea tena kukifua kikosi hicho lakini  kwa masharti magumu.

Kocha huyo ambaye ni miongoni mwa walimu bora Tanzania, hivi karibuni alitangaza kujiuzulu kufundisha kikosi cha Mbeya City kwa madai ya kuchoshwa na mfumo wa uendeshwaji wa  klabu hiyo kutoka kwa baadhi ya viongozi wakuu ambao hakuwataja majina yao.

Taarifa za kuaminika na za uhakika, zimelifikia blog hili jana kupitia kwenye chanzo cha ndani cha klabu hiyo  ambazo  zimeweka bayana kwamba licha ya kocha huyo kutangaza kukikacha kikosi hicho lakini uongozi bado umeonyesha imani kubwa kwake hivyo kumtaka kurejea ili kuendeleza gurudumu la kuinusuru timu hiyo isishuke daraja.

Aidha , moja ya masharti ambayo yamedaiwa kutajwa na kocha huyo ni kwamba  endapo atarejea kikosini asingependa uongozi kumuingilia kwenye majukumu yake ya kiutendaji kwani kazi ya kuwafundisha wachezaji na kuwapanga kucheza ni la Mwalimu si viongozi wengine.

Chanzo hicho kiliendelea kubainisha kwamba, pia uongozi kuweka mipaka kwa mashabiki ambao kwa sasa wameonekana kuitawala klabu hiyo hadi kufikia hatua ya kuingilia utendaji wa mwalimu kwa  kumtaka kupanga wachezaji wanaowataka wao.

Akizungumzia  hilo, Meya wa  Jiji la Mbeya, Athanas  Kapunga ambaye pia ni mwenyekiti wa bodi ya timu hiyo, amesema  suala la kocha kujiuzulu bado linafanyiwa kazi na uongozi na kwamba vikao vya kulijadili bado  vinaendelea kufanyika.

Amesema bado  wanaendelea na vikao  vya ndani hivyo suala la kocha Mwambusi liko mezani nakwamba  hivi sasa ndio wanaelekea  kulijadili na kulitolea tamko kesho Nov 21 katika mara baada ya kukamilika kwa baraza la Madiwani.