KLOPP: NILISHINDWA KUJIUNGA MAN UNITED

Katika kuelekea mchezo wa wapinzani wa jadi ‘derby’ kati ya timu mbili kubwa zenye historia nchini England, Liverpool na Manchester United, kocha wa Liverpool mjerumani Jurgen Klopp ameibuka na kutoa siri namna alivyokaribia kuifundisha klabu ya Manchester United mwaka 2013.

Klopp amesema kuwa alifanya mazungumzo na kocha mkongwe wa Manchester United Sir Alex Ferguson kabla hajastaafu mwaka 2013 na kusema kuwa alifarijika sana na meneja huyo anayemtaja kuwa bora zaidi wa muda wote.

Lakini Klopp anaeleza sababu za kushindwa kujiunga na United wakati huo kuwa haukua muda muafaka kwake kuondoka Dortmund, klabu ambayo alikua na malengo nayo makubwa.

Akimzungumzia Sir Alex Ferguson, kocha huyo wa zamani wa Borrusia Dortmund ya Ujerumani anasema kuwa kocha huyo anaweza kua ndio bora zaidi katika historia ya mpira wa miguu na kusema kuwa ilikua heshima kubwa kwake kuketi na Mskochi huyo mwenye mafanikio makubwa zaidi akiwa na Manchester United.

Hatimaye Sir Alex Ferguson akatangaza kung’atuka na kustaafu kufundisha soka mwaka 2013 na kumuachia tambala hilo David Moyes ambaye alifukuzwa kazi zikiwa zimesalia mechi nne kabla ya kumalizika kwa msimu wake wa kwanza baada ya kuitoa United katika michuano ya klabu bingwa Ulaya, walipomaliza ligi katika nafasi ya saba.

Wakielekea kukutana Jumapili hii, Liverpool na Manchester United, kocha wa Liverpool angeweza kuwa kocha wa Manchester United katika mchezo huu kama angejiunga United 2013.