MBUNGE MBARONI KWA KUBAKA

MBUNGE wa Imenti ya Kati, Gideon Mwiti anayekabiliwa na shtaka la ubakaji Jumanne aliomba mahakama ya Milimani nchini kenya iorodheshe kesi hiyo kusikizwa baada ya uchaguzi mkuu wa Agosti 8, 2017 kufanyika.

Mwiti ambaye amekanusha shtaka hilo alimweleza hakimu mkuu Bw Francis Andayi kwamba 'anatazamia kutetea kiti hicho cha Imenti ya Kati na angetaka kesi iahirishwe ili apambane na wapinzani wake'.

Wakili Dkt John Khaminwa anayemwakilisha Bw Mwiti alimweleza hakimu kwamba, mahakama ndiyo kilele cha demokrasia na mtetezi wa haki za binadamu kuu zaidi.

Akasema Dkt Khaminwa: “ Mheshimiwa, mshukiwa katika kesi hii ni mwanasiasa na atakuwa anawania kiti cha uwakilishi bungeni. Naomba kesi dhidi yake itengewe siku baada ya uchaguzi mkuu wa Agosti 8, 2017.”

Kiongozi wa mashtaka Bw Eddie Kadebe alipinga ombi hilo akisema 'kortini kunashtakiwa wavunjaji wa sheria peke yao na wala sio taaluma wala nafasi za watu zinazoshtakiwa'.

Kadebe alimweleza hakimu: “Naomba hii korti itilie maanani kwamba wanaoshtakiwa mahakamani ni wavunjaji wa sheria na wala sio taaluma za washukiwa. Iwapo ni daktari au  mjuzi au mwanasaikolojia au mpasuaji maiti au taaluma yoyote. Naomba korti iendelee na kesi dhidi ya Mwiti kulingana na kalenda ya mahakama.”

Hakimu aliamuru kesi hiyo iendelee Machi 24.

Mwiti ameshtakiwa pamoja na daktari ambaye anadaiwa alikuwa anawapima wanawake kutambua ikiwa walikuwa na Ukimwi au la.