STARS IKIIKABILI SWAZILAND KESHO COSAFA, JULIO APASUKA YA MOYONI....

TIMU ya soka ya taifa ya Tanzania 'Taifa Stars' kesho itacheza mchezo wake wa kwanza  wa kombe la Cosafa dhidi ya Swaziland katika uwanja wa Royal Bafokeng pembeni kidogo ya jiji la Rustenburg kuanzia majira ya saa 1:30 jioni kwa saa za Afrika Kusini na saa 2:30 kwa saa za Afrika mashariki.

Kuelekea katika mechi hiyo kocha msaidizi wa zamani wa Taifa Stars na sasa kocha mkuu wa Coastal Union, Jamhuri Kiwhelo ‘Julio’ amefurahishwa na uteuzi wa baadhi ya wachezaji vijana, lakini amesema wangekuwa wengi zaidi kuliko wakongwe ili kujenga timu ya baadaye.

“Kilichonifurahisha ni uteuzi wa baadhi ya wachezaji wadogo kama Ajib (Ibrahim), Ndemla (Said),  wachezaji kama hawa wangekuwa wengi katika kipindi hiki cha mashindano, hakika ingetusaidia kutuweka vizuri katika mashindano yajayo”. Amesema Julio na kusisitiza:

“Ukiangalia timu za wenzetu utakuta kuna vijana wengi kwenye timu kuliko wakongwe, kwa mfano nchi kama Ivory Coast, ilikuja hapa (Tanzania) na timu ya vijana kama vile Kipre Tchetche na Michael Balou wa Azam fc, leo hii wanatusumbua katika ligi ya nyumbani, kwahiyo tungechukua wachezaji wengi wadogo kuliko wakongwe kama Aggrey Morris, vijana wakipata uzoefu katika mashindano kama hayo wanaweza kutengeneza mpira wao. Wachezaji wakongwe wangetolewa".

Kuhusu mechi ya kesho, Julio amesema: "Mechi ya kesho mwalimu amesema maandalizi ni mazuri, kama ni mazuri kweli basi tusubiri, naamini wachezaji watafanya kazi yao, kwasababu walifanya mazoezi vizuri, walipata uwanja mzuri"