JULIO AWACHIMBA ‘MKWARA’ WANAOMLETEA MAGUMASHI

Kocha mkuu wa Mwadui FC Jamuri Kihwelo ‘Julio’ amewatolea uvivu wale wote ambao wamekuwa wakibeza mafanikio yake lakini wakidai pengine angefukuzwa mapema lakini yeye anasema bado anadunda na kuwaambia wanaoleta dharau juu yake wasubiri mwisho wa msimu ili wajue Mwadui itakuwa wapi na yeye atakuwa wapi.

Julio amechimba mkwara kwa wote walioanza kumtabiria kuwa atakuwa kocha wa kwanza kupigwa chini msimu huu ndani ya michezo mitano tu ya ligi.

“Kuna watu wamekuwa wakisema timu yangu itakuwa ya kwanza kushuka daraja, hawa watu wanachuki, wasiojua mpira na ni watu ambao wanaropokaropoka. Kuna mtu alisema kocha wa kwanza kufukuzwa kwenye ligi nitakuwa mimi, sitamaliza hata mechi tano”, amesema Julio kocha anayesikika kwa kuwa na maneno mengi.

“Sasahivi mimi nipo nafasi ya sita lakini unakuta watu wanasema tu kwasababu wanavitu vyao walivyoviweka kwenye vichwa, lakini nasubiri siku ya siku itafika wataona timu yangu ikiwa kwenye nafasi za juu halafu niwasikie wanasemaje”.

Mwadui ipo nafasi ya saba (7) kwenye msimamo wa ligi kuu ya Vodacom Tanzania bara ikiwa na pointi 15 baada ya kucheza mechi 10. Mwadui imeshinda mechi 4, imetoka sare michezo mitatu na kupoteza michezo mitatu hadi sasa tangu kuanza kwa ligi.