MCHAKATO WA KUMPATA MGOMBEA NAFASI YA MEYA JIJI

Mbunge wa Jimbo la Mbeya Mjini Joseph Mbilinyi "Sugu" kulia akitafakari wakati wa kikao cha kumchagua Diwani atakaye wania nafasi ya Meya jijini la Mbeya kushoto kwake ni Mwenyekiti wa Chadema Wilaya ya Mbeya mjini John Mwambigija "Mzee wa Upako"

Baadhi ya madiwani wa chama cha Demokrasia na Maendeleo chadema wakimsikiliza Mwenyekiti wa chama hicho Wilaya ya Mbeya Mjini John Mwambigija hayupo pichani wakati wa kikao cha kumchagua Diwani atakaye Peperusha bendera ya chama hicho katika Uchaguzi wa Kumpata Meya wa Jiji la Mbeya.

Mwenyekiti wa chadema Wilaya ya Mbeya John Mwambigija wakati wa kikao cha kumpata mgombea Umeya katika Jiji la Mbeya kupitia chama hicho

Diwani wa kata ya Nzovwe Mchungaji David Mwashilindi akizungumza na waandishi wa habari mara baada ya kumalizika kwa zoezi ka kupiga kura za kumpata mgombea atakaye kiwakilisha chama cha Demokrasia na Maendeleo (Chadema) katika uchaguzi wa kumpata Meya wa jiji la Mbeya.

Diwani wa kata ya Forest,Henry Mwangambaku ambaye ni moja wapo anaye omba kuwania nafasi yaNaibu Meya jiji la Mbeya kupitia cha cha Chadema.

JOTO la kumpata Meya wa Jiji la Mbeya, kupitia chama cha Demokrasia na Maendeleo Chadema (CHADEMA) limezidi kupanda huku likihatarisha hali ya amani ndani ya chama hicho ambacho kimeweza kujizolea viti 26 vya udiwani na CCM ikiambulia viti 10.

Hali hiyo inatokana na mvutano unaoendelea ndani ya chama hicho unaodaiwa kuchangiwa na baadhi ya  madiwani pamoja na  Mbunge wa Jimbo hilo Joseph Mbilinyi.

Wanaowania  nafasi ya Meya wa Jiji la Mbeya ni Albert Kirato, David Mwashilindi, Lazaro Ngonyani na Fabian Sanga,huku mgombea Albert Kirato ndio anatajwa kubebwa na Mbunge wa jimbo hilo.

Wakizungumza na Mtanzania kwa sharti la kutotajwa majina yao, baadhi ya Madiwani, wamekiri kuwepo kwa mvutano huo na kwamba kama hakutakuwepo na muafaka baina ya pande mbili hizo madiwani hao wako tayari kumuunga mkono  meya kutoka chama cha mapinduzi.

Aidha, mbali na mvutano huo wa Meya, lakini pia kumekuwepo na mgogoro wa uteuzi wa viti maalum vya nafasi za udiwani baada ya kudaiwa kufanyika kinyume na utaratibu huku mbunge huyo akitajwa tena kuwa kinara wa kuwapanga watu wake.

Akizungumza na Fahari News Mbunge wa jimbo hilo, Joseph Mbilinyi, ambaye alionyesha kushangazwa na kauli hizo zinazotolewa na baadhi ya madiwani na kudai kuwa yeye binafsi hana muda wa kuingilia mchakato huo wa kumpata Meya lakini anachoshauri ni kwamba ni vema kiongozi akapatikana kwa kufuata taratibu na kanuni za chama.

Aidha, Mbunge huyo aliwataka madiwani hao kutambua kuwa suala la kumpata Meya wa jiji la Mbeya linapaswa kufuata taratibu na kanuni za chama kwani meya huyo anaenda kuwawakilisha wananchi wote hivyo wasifanye masihala.

“Ikumbukwe kuwa umeya wa mbeya mjini si kusimamia machinga wala kuchungulia mipango miji tunataka meya atakayeenda sambamba na kasi mpya ya Rais John Pombe Magufui,”amesema.

Aidha, chama hicho kupitia Jiji la Mbeya, kimefanikiwa kufanya uchaguzi wa uteuzi wa majina matatu ya nafasi ya Meya kwa kupigiwa kura na madiwani ambapo David Mwashilindi alipata kura 24, Albert Kirato ambaye alipata kura 8 huku Lazaro Ngonyani akipata kura 2,.

Hata hivyo kwa mujibu wa utaratibu wa chama hicho ni kwamba majina hayo yanawasilishwa makao makuu ya chama ambapo wao ndio wenye dhamana ya kurejesha jina la Meya.

Mwisho.