MFAHAMU MWANAMITINDO ANAYEUGUA UGONJWA WA PAKA

Mwanamitindo wa Uingereza, Caitin Stickels mwenye umri wa miaka 29,  amekuwa akisumbuliwa na  tatizo ambalo ni nadra sana la kiafya linalofahamika kama ‘Ugonjwa wa macho ya paka’ unaojulikana kitaalamu kama ‘Schmid-Fraccaro Syndrome.’ ambao humsababishia maumivu makali sana.

Tatizo hilo la kiafya humfanya aonekane kama paka.

Hali yake ilimvutia mpiga picha za mitindo kutoka Uingereza Nick Knight. Alimuona  mwanamitindo huyo kutoka Seattle mara ya kwanza kwenye ukurasa wake wa Instagram.

Hata hivyo mwanamitindo huyo bado anafurahishwa na mafanikio aliyoyapata licha ya kusumbuliwa na ugonjwa huo.

“Ni mabadiliko makubwa zaidi mema yaliyowahi kutokea katika maisha yangu,” alisema.

Watu wanaougua ugonjwa huo wanaweza kuwa na matatizo katika maumbile ya masikio yao, moyo na kwenye figo. Wakati mwingine, viungo vingine mwilini huathiriwa.

Sura ya Caitin si kama ya wanamitindo wengi ambao wamevuma sana. ‘Urembo’ wake si kama ule ambao wengi wamezoea kuuona ukiangaziwa kwenye majarida, filamu na runinga.

Alisema “Sikuwahi kuwa na ndoto ya kuwa mwanamitindo au kufikiria ningeshiriki katika tasnia ya mitindo na mavazi,”

Aliongeza kuwa huwa anakumbana na changamoto kadhaa katika maisha yake kutokana na ugonjwa huo unaomsumbua.

“Mafadhaiko kutokana na ugonjwa huu huwa ni ndani ya moyo wangu, lakini kazi yangu ya uanamitindo, uigizaji na uimbaji hunisaidia sana kusahau maumivu niliyo nayo moyoni.” anasema.

Caitin anasema pia hupata maumivu makali mwilini na kupata kichefuchefu.

“Ni figo moja pekee inayofanya kazi, kwa hivyo huwa inanibidi kunywa maji sana. Pia mwili wangu huathiriwa sana na mabadiliko katika mazingira, lakini kwa sababu umekuwa hivyo kwa muda mrefu, watu wengi niliotangamana nao huwa hawatambui kama nina tatizo. Mimi ni mgumu kama jiwe.”

“Nafikiri jambo jingine ni kwamba macho hukaa kama ya paka wakati wote na kusababisha watu kuniogopa. Hii hata hivyo huniwezesha kuona vyema usiku. Nalipenda jua na mara nyingi hutoka nje na kutembea, lakini huwa linaniumiza macho yangu.”

Vile vile aliongeza kuwa pamoja na hali yake, baadhi ya watu wamemzoea na humchukulia kama mtu wa kawaida tu japo kwa nyakati zingine baadhi yao humuogopa hasa watoto wanapokutana naye kwa mara ya kwanza.

Alisema kuwa anafurahishwa na jamii inayomzunguka kwa kuwa humtunza kama mmoja wao na haimtengi.

“Watoto wakati mwingine ndio hunishangaa. Lakini mara nyingi huwa sikabiliwi na unyanyapaa.

Aidha alizungumzia kuhusu maisha yake ya utotoni na kusema kuwa pamoja na yote aliyokumbana nayo, huwa anayakubali kwa kuwa hakuna binadamu aliye mkamilifu chini ya mbingu.

“Utoto wangu ulikuwa vile vile. Watoto ni watoto tu, ni kweli walinicheka na kunichezea. Lakini nani hakufanyiwa hivyo?, sote huwa na kasoro pahala fulani. Hakuna aliyekamilika,”

Hizi ni baadhi ya picha za mwanamitindo huyo akiwa katika mionekano tofauti.