STAND UNITED YAKOMAA NA BAHANUZI, SASA YAMTENGEA MILIONI 10

BAHANUZI

Uongozi wa Stand United ya mkoani Shinyanga, bado unazidi kuonyesha mapenzi yake kwa straika wa Yanga, Said Bahanuzi na umesisitiza upo tayari kutoa kitita cha Sh milioni 10 ili kumnasa katika usajili huu wa dirisha dogo.

Bahanuzi kwa sasa hana nafasi katika kikosi cha kwanza cha Yanga, huku wakitumika zaidi akina Geilson Santana Santos ‘Jaja’ na Jerry Tegete katika nafasi moja ya ushambuliaji.

Stand inamhitaji Bahanuzi kwa udi na uvumba, ili iweze kuimarisha safu yake ya ushambuliaji ambayo bado haijakaa sawa tangu kuanza kwa michuano ya ligi kuu msimu huu.

Hii ni mara ya pili kwa Stand kuitaka Yanga iwapatie mchezaji huyo, baada ya kumkosa katika usajili wa dirisha kubwa kabla ya kuanza kwa msimu huu.

Kocha Msaidizi wa Stand, Athumani Bilali,  amesema uongozi wa timu yao hivi sasa upo katika harakati kabambe za kuhakikisha wanampata Bahanuzi ambaye mwaka 2012 aliibuka mfungaji bora wa michuano ya Klabu Bingwa Afrika Mashariki na Kati (Kagame) na kuongeza kuwa tayari wamemtengea kiasi cha fedha kisichozidi milioni 10.

“Siku ya Jumanne (kesho) tunatarajia kukutana na viongozi wetu kwa ajili ya kupanga mikakati yetu ya raundi ijayo ya ligi kuu, ikiwa ni pamoja na suala zima la usajili.

“Hata hivyo, kwa sasa uongozi wetu unaendelea na harakati za kuhakikisha safari hii Yanga inatupatia Bahanuzi baada ya kumkosa hapo awali,” alisema Bilali.