UMEME KUNUFAISHA VIJIJI 93 NJOMBE NA IRINGA

WATEJA wa Shirika la Umeme Tanzania (Tanesco) katika mikoa ya Iringa na Njombe wanatarajia kuongezeka kutoka 63,300 wa sasa hadi zaidi ya 93,000 ifikapo mwaka 2017.

Ongezeko hilo linakwenda sambamba na kuviunganisha vijiji vipya 93 baada ya vingine 84 katika mikoa hiyo kuunganishwa na umeme wa gridi ya Taifa kupitia awamu ya pili ya mradi wa usambazaji umeme vijijini unaotekelezwa kupitia Wakala wa Umeme Vijijini (REA).

Meneja wa Tanesco mkoani Iringa, Sarah Assey akizungumza ofisini kwake jana alisema ongezeko hilo la wateja 30,000 wapya kwa mpango wa kuwaunganisha 15,000 kila mwaka, litakwenda sambamba na matumizi ya mita za Luku kwa wateja wake wote.

“Mpango wa shirika ni kuona wateja wetu wote wanafungiwa mita za Luku ifikapo mwaka 2017; mpango utakaohitimisha matumizi ya mita za zamani,” alisema na kuongeza kwamba mpaka sasa zaidi ya wateja 38,000 katika mikoa hiyo wamekwishafungiwa mita za Luku.

Alisema mpango wa kuwaunganisha na mita za Luku wateja wao wote utapunguza ajira ya wasoma mita na hivyo kupunguza matumizi ya shirika.

Alisema Tanesco inataka kuondokana na matumizi ya mita za zamani kwa wateja wake kwa sababu ufanisi wake unazidi kushuka hivyo kulisababishia hasara.

Meneja huyo alisema kuachana na matumizi ya mita hizo za zamani kutamaliza pia kile kinachoonekana kama kero wanayopata wateja wao wakati wa kulipia Ankara zao katika ofisi za shirika hilo.